yeh dunyaa maiN ne Thukraayee bohat hai!

[Sarwar A. Raz]

taqreeb-e-Ghazal

Haal hee meN Dallas (Texas, USA) ke ek mushaa,i'reh meN janab :Wasim: Barelavi kaa ek miSra' ba-t^aur-e-t^araH tajweez kiyaa gayaa:

:yeh dunyaa maiN ne Thukraayee bohat hai:

maiN ne bhee is meM fikr kee aur apnee Ghazal pesh kar rahaa hooN. is meN daanistah Molana :Hasrat: Mohani ke ek she'r se istifaadah kiyaa gayaa hai, bal.k yooN kehnaa ziyaadah SaHeeH hai keh un ke maZ^moon ko is Ghazal kee zameen aur beHr meN adaa karne kee kosish kee gayee hai. Molana kaa she'r hai:

naheeN aatee jo yaad un kee to barsoN tak naheeN aatee
magar jab yaad aate haiN to akcar yaad aate haiN

yeh waZ^aaHat is liYe Z^arooree hai keh kaheeN mujh par :sarqeh: kaa ilzaam nah lag jaaYe!

ab aap Ghazal dekhiYe. aap kee raaYe aur Khayaalaat kaa intiz^aar rahe gaa. shukriyah!
===========================
GHAZAL

mire jab bhee qareeb aayee bohat hai
:yeh dunyaa maiN ne Thukraayee bohat hai!:

maiN samjhotaa to kar looN zindagee se
magar z^aalim yeh har-jaayee bohat hai!

tumheN sarshaaree-e-manzil mubaarak!
hameN yeh aablah-paayee bohat hai

kahaaN maiN aur kahaaN teree tamannaa!
magar yeh dil! keh saudaayee bohat hai!

balaa se gar naheeN suntaa hai koyee
majaal-o-taab-e-goyaa,ee bohat hai!

miree rindee ba-raNg-e-paarsaayee
Hareef-e-Khauf-e-ruswaayee bohat hai!

maiN Hasrat-aashnaa-e-aarzoo hooN
miree Gham se shanaasaayee bohat hai

:nah aayee yaad to barsoN nah aayee
magar jab aayee to aayee bohat hai!:

maiN Khud ko DhooNDtaa hooN anjuman meN
mujhe eHsaas-e-tanhaayee bohat hai!

zamaane ko shikaayat hai yeh :Sarwar:
keh tujh meN boo-e-Khudraayee bohat hai!
=====================
Sarwar A. Raz :Sarwar:

[rehanachaand]

Adab Raaz saheb

khoob zameen khoob fasal..ek asal se achi ek aur asal...aapki koshish hamesha kamyab hoti hai..is bar bhi kamyaab rahi..ab jaa kar ye ehsaas mila...waqt guzar sakta hai..jazbat nahi..iqrar se muh moda jaasakta hai takraar se nahi... bahut khoob..khud ko saalim rakhne ki tag-o-dudh jaari rahe...yeh hi bahut...

chaand

[Sarwar A. Raz]

Adab Raaz saheb

khoob zameen khoob fasal..ek asal se achi ek aur asal...aapki koshish hamesha kamyab hoti hai..is bar bhi kamyaab rahi..ab jaa kar ye ehsaas mila...waqt guzar sakta hai..jazbat nahi..iqrar se muh moda jaasakta hai takraar se nahi... bahut khoob..khud ko saalim rakhne ki tag-o-dudh jaari rahe...yeh hi bahut...

chaand

a'zeezah Chand: salaam!

idhar itnaa maSroof rahaa keh aanaa hee nah huwaa. aaj aayaa to aap kaa Khat^ dekhaa. Ghazal kee pazeeraayee ke liYe dilee mamnoon hooN. aap ne itne achhe alfaaz^ se mujh ko yaad kiyaa to yeh aap kee baRaayee hai. Khush rahiye.

Sarwar A. Raz :Sarwar"

[monali]

SarwarRaaz Saheb,

Aapki ghazal meN raanaayee bahut hai!!

meri or se daad qubool kijiye,

Mukhlis,
mona

[Anmol]

Respected Sarwar SaaHib, aadaab!

tumheN sarshaaree-e-manzil mubaarak!
hameN yeh aablah-paayee bohat hai

Waah!

balaa se gar naheeN suntaa hai koyee
majaal-o-taab-e-goyaa,ee bohat hai!



:nah aayee yaad to barsoN nah aayee
magar jab aayee to aayee bohat hai!:

Khoob!

maiN Khud ko DhooNDtaa hooN anjuman meN
mujhe eHsaas-e-tanhaayee bohat hai!

bahut Khoob!

aap ki ghazal bahut achchhi lagi, khusoosan quoted ashaar per Khusoosi daad pesh hai.

Anmol

[Sarwar A. Raz]

Respected Sarwar SaaHib, aadaab!

tumheN sarshaaree-e-manzil mubaarak!
hameN yeh aablah-paayee bohat hai

Waah!

balaa se gar naheeN suntaa hai koyee
majaal-o-taab-e-goyaa,ee bohat hai!



:nah aayee yaad to barsoN nah aayee
magar jab aayee to aayee bohat hai!:

Khoob!

maiN Khud ko DhooNDtaa hooN anjuman meN
mujhe eHsaas-e-tanhaayee bohat hai!

bahut Khoob!

aap ki ghazal bahut achchhi lagi, khusoosan quoted ashaar per Khusoosi daad pesh hai.

Anmol

a'zeezah Anmol: salaam!

ek muddat ke ba'd aap se baat ho rahee hai. zindagee bohat maSroof ho gayee hai aur har shaKhS hee is kaa shikaar hai. Ghazal kee sitaayish aur daad ke liYe shukriyah qubool keejiYe. yahaaN aane meN kuchh der huyee. Khayaal nah kareN.

Sarwar A. Raz "Sarwar"